Umaboten iti innem ti natay idinto a pito ti nadunor kalpasan ti mano nga aldaw nga awan sardayna a tudo gapu iti nagtipon nga epekto ti saan a nasayaat a paniempo.
Segun iti National Disaster Risk Reduction and Management Council, karaman ditoy dagiti dua a natay iti landslide idiay Benguet, dua iti rockslide idiay Rodriguez, Rizal idinto a dagiti nainayon a natay ket manipud iti La Union – maysa ti nalmes ken maysa ti nakoriente.
Kadagiti met pito a nadunor ket lima idiay Baguio City gapu iti landslide, maysa iti insidente ti landslide idiay La Trinidad idinto a ti maysa ket gapu iti aksidente idiay Kapangan.
Agtultuloy ti panagpangato ti bilang dagiti naapektaran a pamilia maibasar iti rekord ti NDRRMC nga umabot iti 74,755 a pamilia wenno katukad iti 261,048 nga indibidual.
Umabot met iti 2,519 a pamilia wenno katukad iti 7,580 nga indibidual ti adda pay laeng kadagiti evacuation center.
