VIGAN CITY – Pinasingkedan ni Ilocos Sur Police Provincial Director PCol. Marlo Castillo a sangagasut walopulo ket walo a personalidad ti nakemmeg manipud iti uppat a pulo ket innem a balligi nga operasyonda kontra iti iligal a sugal idinto nga umabot iti PHP36,952 ti pusta a nakumpiskar.
Manipud iti uppat a pulo ket innem nga operasyon, tallopulo ket walo a kason ti naipilada ken adda walo a pending a manamnama met a maipila ita nga aldaw.
Segun ken ni Castillo, ti balligi nga operasyonda ket mayannurot iti kampanya ni PNP chief PGen. Rodolfo Azurin Jr. kadagiti security framework wenno programs ken mangipakita a nainget ti panangparmekda kadagiti iligal nga aramid dagiti umili.
Malaksid dayta, dua gasut uppat a pulo ket maysa met dagiti nakemmeg iti one-time big time on wanted person nga operasyonda sipud idi September 6.
