VIGAN CITY – Arigna nagdoble iti bilang iti shooting incidents iti probinsiya ti Ilocos Sur ita a bulan nu idasig iti isu met laeng a bulan idi napalabas a tawen kas maibasar iti rekord manipud ti Ilocos Sur Police provincial Office.
Segun ti report, manipud Oktubre 1 agingga ita nga aldaw ket addan iti pito a napasamak a shooting incident a nakabiktimaan iti walo ngem nakatayan iti tallo ken nakadunuran iti lima.
Nu ikomperar iti napalabas a tawen, bulan ti Oktubre, adda laeng iti uppat a pakabuklan iti shooting incidents a napasamak.
Nu pay kasta, nu manipud Enero agingga iti Oktubre iti agdama a tawen, adda iti pito pulo ket pito a bilang iti pammaltog, dua pulo ket maysa iti nasolbar, tallo pulo ket siyam iti ‘cleared’ ken tallo pulo ket pito iti maim-imbestigaran idinto nga idi napalabas a tawen iti isu met laeng a bulan ket adda iti pakabuklan a walo pulo ket innem a kaso iti pammaltog, sangapulo ket lima iti nasolbar, dua pulo ket lima iti ‘cleared’ ken innem a pulo ket maysa iti maim-imbestigaran.
Nu “solved” iti mapagpapatangan ket kayat na a sawen a nabigbig, nakemmeg ken napilaan iti kaso dagiti suspek idinto a dagiti maibilang a “cleared” ket naipila iti kaso ngem saan da a nakemmeg dagiti suspek.
