VIGAN CITY – Umaboten ti pito ti bilang dagiti natay iti rinnupak ti nagbaetan dagiti kameng ti Kilusang Larangang Guerilla South Ilocos Sur ken ti tropa dagiti militar idiay Brgy. Suagayan, Sta. Lucia, Ilocos Sur.
Iti pannaki-uman ti Bombo Radyo Vigan ken ni Major Rogelio Dumbrique iti 81st Infantry Battalion, lima kadagiti kameng ti KLG-SIS ti natay ken maysa kadagiti suldado.
Kabayatanna, nairaman pay ti maysa a sibilyan a mapan agsingir iti pautangna idi pinaltugan dagiti kameng ti NPA ta impagarupda nga isu ket kadua dagiti militar.
Dagiti met lima a suldado a nakirinnupak ket natalgeden ti kasasaadda ket matamtamingdan iti ospital.
Nupay kasta, agtultuloy ti panangipakaammo dagiti pannakabagi ti linteg iti pamilia ti suldado a natay ken naipasiguradon a maikkan ti gunguna gapu ti panangisakripisyona ti biagna iti napasamak.
Nagpalagip ni Dumbrique iti publiko a no makadlawda nga adda dagiti terorista iti lugarda ket rumbeng nga insigida a maipakaammo kadakuada.
