Umaboten iti duapulo ket tallo ti natay gapu iti nagtipon nga epekto dagiti bagyo Ferdie, Gener ken Helen.
Segun iti National Disaster Risk Reduction and Management Council, siam ti naggapu iti MIMAROPA, uppat iti Region 6, BARMM ken Region 9 ken dua met manipud iti Region 7.
Adda pay met ti sangapulo ket tallo a nadunor ken sangapulo ket lima ti mapukpukaw.
Kabayatanna, nasurok 300,000 a pamilia wenno katukad iti maysa milion ti naapektaran iti madi a paniempo ken 1,441 a barangay kadagiti sangapulo ket tallo a rehion iti pagilian.
Manipud iti nasao a bilang, 69,630 a tattao ti agtaltalinaed kadagiti innem a gasut tallopulo ket uppat nga evacuation centers idinto a 61,000 met ti kimmamang kadagiti kabagyanda.
Iti agdama, umaboten iti nasurok sangapulo ket pito milion a pisos a tulong ti gobierno ti naipaayen kadagiti apektado a tattao.
