Umaboten iti uppat a pulo ti bilang dagiti natay idiay Japan gapu iti saan a gagangay wenno ti nakaro nga snow a mapaspasaran idiay Japan.
Iti pannaki-uman ti Bombo Radyo Vigan ken ni Bombo International News Correspondent Hannah Galvez, kaaduan kadagiti natay ket dagiti senior citizen a natinnag manipud iti panagdalusda iti atep ti pagtaenganda, adda met dagiti nagaburan iti snow ken dagiti nagsagaba iti hypothermia.
Gapu iti nakaro nga snow ket apektado ti trade iti nasao a pagilian agraman dagiti pagadalan ken transportasyon.
Nabalakadan met dagiti agindeg a saan a rumuar no awan la ketdi ti napateg a gagaraen ket no man rumuar, masapul a siguradoen nga adda kadua tapno no bilang adda mapasamak ket adda maysa a mabalin nga apaarayat.
Maibalbalakad pay ti panangliklik iti biahe gapu iti poor visibility, dalusan ti snow kadagiti pagtaengan ken limitaran ti exposure tapno maliklikan ti frost bite.
Posible nga agingga inton Lunes ket mapasaranto pay laeng ti nakaro nga snow kas maibasar iti Japan Meteorological Agency.
