VIGAN CITY – Nagyaman ni Provincial Quarantine Officer Martel Quitoriano iti tignay ti LGU-Bantay ken PNP nga idaulwan ni PLt. Juan Jhayr Maggay kalpasan nga adda manen ti nasalamaanda a nagipastrek iti karne manipud Abra.
Iti pannaki-uman ti Bombo Radyo ken ni Quitoriano, napakaamoanda manipud ti Department of Agriculture nga addan iti kaso ti African Swine Fever idiay Abra isu a nainget ti panagbambantayda tapno awan ti makalibas nga agipastrek kadagiti kontrabando ditoy probinsia ta saandan kayat a mapasamak ti ASF outbreak gapu ta ad-addanto manen a parigat kadagiti agtartaraken iti baboy.
Dagiti suspek ket kagrupo dagiti matiltiliw a suspek idi kallabes ket pakaladingitanna a dagiti pay kaprobinsyaanna ti manggan-gandat a mangilibas ti karne numanpay ammoda ti kinainget a maipatpatungpal iti probinsya.
Maipalagip a nailugan iti van ti agarup innem a gasut sangapulo ket innem a kilo ti karne ti baboy nga itan ket addan iti kustodiya ti Provincial Veterinary Office.
