Immadu ti bilang dagiti tattao a naapektaran iti nagtipon nga epekto ti southwest monsoon, Bagyo Butchoy ken Carina.
Segun iti National Disaster Risk Reduction and Management Council o NDRRMC, umabot iti 1.1 M a tattao ti naapektaran gapu iti madi a paniempo kadagiti 997 a barangay manipud Regions 1-12, CALABARZON, MIMAROPA, CARAGA, BARMM, CAR, ken NCR, katukad iti 245,298 a pamilia.
Manipud iti nasao a bilang dagiti apektado, 12,199 a pamilia wenno katukad iti 52,000 a tattao ti agtaltalinaed kadagiti 263 nga evacuation center idinto a 600,000 a tattao ti pinilida ti agtalinaed iti pagtaenganda wenno kumamang kadagiti kabagyanda.
14 dagiti natay – walo ti kumpirmado idinto nga innem ti maberberipika; dua ti nadunor ken dua ti mapukpukaw.
Kabayatanna, PHP33M met ti gatad ti tulong a naipaay ti gobierno kadagiti rehion a naapektaran.
