VIGAN CITY – Umaboten iti sangaribo uppat a gasut sangapulo ket dua iti kaso ti dengue ditoy probinsiya kas maibasar iti kaudian a rekord nga iggem ti Provincial Health Office idi July 25.
Uray pay kasta, segun ken ni Dr. Carmeliza Singson, mangidaulo ti PHO- Ilocos Sur, awan pay iti maideklerar a dengue outbreak ditoy probinsiya ta uppat pay laeng dagiti natay a dengue victims a kaaduan kadakuada ket naladaw a nagpaospital ken nag-self medicate da.
Mainaig dayta, inbaga ni Singson a nainget iti information dissemination da inaig iti 4S campaign ti Department of Health.
Al-allukoyen ti doktor iti publiko a nu makita da nga aggurigor dagiti annak wennu kameng ti pamilya da ket insigida nga ipadoktor da tapnu makita a naimbag nu anya iti sakit na ken nu anya dagiti agas a maiyannatup a tumaren da.
