VIGAN CITY – Immado dagiti mannalon a nagmula iti tabako idiay ili ti Caoayan ta nakita da iti nagapuanan dagiti mannalon nga immun-unan a nagmula iti tabako.
Pinasingkedan pay ni Municipal Agriculture Officer Benny Quiocho nu ikomperar kadagiti naglabas a tawen a panagmula dagiti mannalon idiay Caoayan iti tabako, napinpintas iti produksyon da itatta a tawen isu a namnamaen da nga adu iti maganansya da.
Kabayatanna, inlawlawag ni Quiocho a nu iti maysa a mannalon ket nababa iti produksyon na itatta a tawen, posible nga inton umay a tawen ket saanton nga ipalubos iti kompanya a nakipinnirmaan da iti katulagan nga agmula pay isuna.
Patien na a nu nababa iti produksyon iti maysa a mannalon iti tabako ket saan na a sinurot dagiti naisuro kenkuana nga usto a wagas iti panangimanehar iti mula a tabako.
