Bilang dagiti hog raiser a naapektaran iti African Swine Fever iti ili ti San Emilio, umaboten iti duapulo ket pito

VIGAN CITY – Duapulo ket piton a hog raiser ti naapektaran iti African Swine Fever manipud kadagiti tallo a barangay iti ili ti San Emilio.

Iti pannaki-uman ti Bombo Radyo Vigan ken ni Mayor Joey Warren Bragado, umaboten iti nasurok dua gasut a baboy ti naidalan iti culling operation kalpasan ti pannaka-cull dagiti uppat a pulo a baboy idi kalman gapu ti panagpositiboda iti ASF.

Nupay kasta, nangbukelda metten iti singasing kadua ti Department of Agriculture para ti pannakaipaay ti tulong kadagiti naapektaran a hog raiser malaksid pay ti programanto met ti ili para kadakuada.

Iti agdama, agtultuloy ti monitoring ken ti panangisayangkatda iti laboratory testing kadagiti baboy a posible nga apektado iti nasao a sakit.