Nasurok 16,000 nga examinee ti ag-take iti Career Service Examination inton March 2, 2025 iti Rehion Uno.
Iti pannaki-uman ti Bombo Radyo Vigan ken ni Regional Director Hedy ‘Jiggs’ Lardizabal, ti 16,466 a bilang dagiti examinees ita a tawen ket ad-adu no yarig idi 2024.
3,137 ti examinees manipud Ilocos Sur; 2,200 manipud Ilocos Norte; 3,712 manipud La Union; ken 7,417 manipud Pangasinan.
Malaksid iti Ilocos Sur National High School nga agserbi a testing venue iti Ilocos Sur ket nainayon pay ti Ilocos Sur Polytechnic State College-Candon City Campus ita a tawen.
Nupay kasta, nakasaganan ti Civil Service Commission para iti exam ngem yurayda laeng ti panagsangpet dagiti test booklet ken ti pannakaiplastar dagiti testing venue.
Nagpalagip met ni Lardizabal kadagiti examinee a saanda a maladaw inton aldaw ti exam ta agrikep dagiti testing venue iti oras ti 7:45 iti bigat.
Ipakita ti ID nga inusar idi nag-apply ta nainget a maipatungpal ti ‘No ID, No Exam’ ken maiparit ti agusar kadagiti electronic device kas ti calculator, wenno dadduma pay nga exam aid.
