VIGAN CITY – Agtultuloy ti imbestigasyon dagiti kameng ti Sinait Municipal Police Station iti pannakatay ti maysa a lalaki a napaltugan idiay Brgy. Sapriana.
Nabigbig ti biktima a ni Jay-ar Salcedo, agtawen iti tallopulo ket walo a taga-Sapriana, drug surrenderer.
Iti pannaki-uman ti Bombo Radyo Vigan ken ni PLt. Joel Idica, adda iti laud a paset ti pagtaengan ti ulitegna a ni Joel Salcedo ti biktima idi pinaltugan dagiti dua a saan pay a nabigbig a suspek a naka-jacket, kallugong ken facemask a naglibas kalpasan ti pammaltog.
Malaksid ti dayta, im-imbestigaranda pay iti mapapati a pannakainaig ti suspek iti riri no makainom iti arak.
Nagsagaba iti tallo a tama ti bala ti akin-kannawan nga abaga ken takyag ti biktima a naipaagas iti ospital ngem saanen a naisalakan ti biagna.
Naala iti nakapasamakan ti krimen ti uppat nga empty shell ti caliber 45 a paltog.
