VIGAN CITY – Nakasagana a mangipila iti kaso ni Tommy Paiste Javines, agtawen iti limapulo ket uppat, negosyante a taga-Barangay Tamag, Vigan City kontra ken ni Nickson Villanueva Abejon, agtawen iti duapulo ket siam, construction worker nga agnaed iti nasao met laeng a barangay a nagtakaw iti puestoda ta kayatda a maikkan hustisia ti inaramidna.
Iti pannaki-uman ti Bombo Radyo Vigan ken ni Javines, agin-inventory ti asawana a ni Geraldine ta sigud a mapukpukawandan gapu ta kanayon a malukatan ti arwanganda ngem saanda laeng a nagtigtignay gapu ti awan nga ebidensya agingga idi napanunotanda ti agpaikabil iti CCTV.
Naminsan a parbangon ket nadlawda manen a napukawanda ket idi kinitada ti CCTV, nalasin ti biktima ti suspek a dati met laeng a kaduada babaen ti eyeglasses a suotna, estilo ti buok, rupa ken ti tattoo iti bukotna.
Innayon ti biktima a damag-damagen ti suspek kadagiti kakasinsinna no adda nakaikabil a CCTV iti puesto.
Nupay kasta, dagus met nga impakaammoda iti barangay ken narespondean met dagiti pannakabagi ti linteg ket insuko met laeng ti ina ti suspek dagiti tinakaw ti anakna.
Kabayatanna, ti PHP3,500 a tinakaw ti suspek ket naala manipud iti wallet ti asawana, sabali pay dagiti barya ken ti PHP2,760 a gatad ti sigarilyo kasta payen ti PHP1,000 a gatad ti grocery.
