VIGAN CITY – Innem a tama ti paltog ti sinagrap ni Waren Calaoagan Cubangbang, agnaed iti Barangay San Sebastian, San Vicente a natay iti napasamak a pammaltog idiay Barangay Bantaoay, San Vicente.
Iti pannaki-uman ti Bombo Radyo Vigan ken ni Police Captain Pedro Halover, ulo, bakrang ken bukot ti tama ti biktima a puon ti pannakatayna.
Inlawlawagna nga awan met ti dati a nakariri ti biktima ngem daytoy ket maysa a drug surrenderer, nalaing a sumugal ken naidarum idi gapu ti panagtakawna.
Agosto 11, 2016 ket napaltugan manen ti biktima idiay Barangay Gongogong, San Ildefonso ngem nakalasat.
Tawen 2017 ket paltuganda koma manen ti biktima kabayatan ti kaaddana iti natayan ngem sabali idi ti napuntaan.
Maipalagip nga imanmaneho ti biktima ti motorsiklona a naggapu iti galyeraan idin ta nakasinnabatna ti nakamotorsiklo met laeng a suspek nga idi makalabes bassit dagitoy ket nagbweltada tapno paltugan ti biktima.
Idi damo pay laeng a mapaltugan ti biktima ket dagus a timpwak ti backrider-na a napan nagkamang iti kataltalunan.
Iti agdama, agtultuloy ti panangduktal dagiti pannakabagi ti linteg ti pakabigbigan ti suspek ken no ania ti motibona.
