VIGAN CITY – Agtaltalinaed iti ospital para iti naan-anay a pannakatamingna ni Fe Plastina, agtawen ti limapulo ket dua nga agnaed idiay Brgy. Pussuac, Sto. Domingo gapu iti adu a tama iti paltog a sinagaba na idi pinaltugan ti kalugaran na idi rabii ti January 12.
Adda iti uneg ti sarisari store na ti biktima idi dimteng ti suspek a nangpaltog kenkuana iti mamin-adu a daras ket amin a naiputok kenkuana a bala ket simrek iti bagi ti biktima isu a dimmalan iti sumagmamano nga oras nga operasyon.
Mapapati a napasaktan ti biktima iti rikna ti suspek agsipud ta nadakamat ti barangay chairman iti lugarda a nalaing a sumao ti biktima nangruna kadagiti nakautang kenkuana.
Maipalagip a ti suspek a ni Jayvee Torrijos, agtawen dua pulo ket pito, awanan iti pagsapulan a nakemmeg idiay Brgy. Cabalangegan, Vigan City ket isu iti intudo ti biktima ken insurat na iti papel iti nagan na a nangpaltog kenkuana.
