VIGAN CITY – Pimmusay bayat ti pannakatamingna ni Gilbert Domingo, agtawen iti uppat a pulo a taga-Maynganay Norte, Sta. Maria kalpasan ti panangbagkong kenkuana ni Florentino Montero, agtawen iti innem a pulo ket tallo nga agnaed iti nasao a lugar.
Iti pannaki-uman ti Bombo Radyo Vigan ken ni P/Lt. Joel Dasargo iti Sta. Maria Municipal Police Station, nabartek a napan nagprobokar ti biktima iti pagiinuman ti suspek ket kinaritna ti grupoda.
Gapu ti dayta, nagriri ti suspek ken ti biktima ket nangala ti suspek iti patadem ket binagkongna ti namindua a daras ti biktima a nakapurwan iti barukong ken bukotna .
Patien dagiti pannakabagi ti linteg nga adda susik iti nagbaetan ti suspek ken biktima ngem nupay kasta, agtultuloy ti imbestigasyon.
Iti agdama, nakaibalud ti suspek ket maisagsaganan ti kaso a sangwenna idinto a naituding met a maidalan iti autopsy ti bangkay ti biktima.
