VIGAN CITY – Sangapulo a ribo a pisos ti maawat ti kapardasan a kumuttong wenno bumaba ti dagsenna iti irusat ti Narvacan Fitness Group a Biggest Loser Challenge.
Kas paset ti panangipasagepsep iti panamagtalinaed iti kinasalun-at ti bagi, maipaganetget ti kinapateg ti panagwatwat tapno lumag-an ti timbang, matunaw dagiti nalabes a taba a pagtaudan iti adu a sakit kas iti hayblad, sakit iti puso, diabetes ken dadduma pay.
Ti kadakkelan iti maksay a timbang wenno kapardasan a kumuttong iti naituding a petsa manipud iti Hulio 1, 2022 agingga iti Agosto 16, 2022 ti makaala iti grand prize a P10,000 idinto a consolation prize met para kadagiti uppat a sumaruno a Biggest Losers.
Silulukat ti pasalip kadagiti agtawen iti duapulo ket dua agpangato a masapul ket maidalanda iti assessement ken residenteda iti Narvacan.
Dagiti partisipante ket masapulda a makompleto ti registration ken waiver form-da tapno maipasada iti aldaw ti June 29 pakairamananen ti medical certificate.
Ti inisial a panangala iti timbang ket maiwayat inton Hulio 1, alas tres iti malem isu a masapul nga ag-short ken sports bra dagiti babbai idinto a shorts kadagiti lallaki.
Masapul nga agatendarda iti dua a workout sessions iti linawas, mabalin a Zumba wenno Taebo nga iwayat ti Narvacan Fitness Group iti tunggal Martes, Huebes, ken Sabado ngem nabalin nga agbaliw ti workout schedule ta depende ti waya dagiti instructor.
Ti maudi a panagpatimbang ket maiwayat iti alas sais iti rabii iti Agosto 16, babaen ti panagaramat met laeng iti dati nga outfit wenno bado a naaramat iti umuna a panagala iti timbang.
No adda ag-tie, pagguduaan dagiti mangabak ti premio.
Kabayatanna, karbengan dagiti organizers nga idiskalipika ti asino man a partisipante a saan a sumurot iti naituding a guideline.
