Ngimmato iti maysa trilion a pisos ti pondo ti Department of Education kalpasan nga inaprubaran ti bicameral conference committee ti P86.6 billion a nayon iti national budget para iti 2026.
Iti umuna nga aldaw ti deliberasion ti bicam panel, sinelyoan dagiti agpampanday-linteg ti pannakaingato ti pondo ti DepEd manipud iti P874.5 billion iti National Expenditure Program a nagbalinen a P961.3 billion.
Segun ken ni House Appropriations Committee Chair Mikaela Suansing, kadakkelan ti nailatang iti basic education facilities nga adda P57.3 billion a nayon, umanay para iti pannakaipatakder ti nasurok-kumurang 35,000 a klasrum inton 2026.
Ngimmato met iti P13.9 billion ti pondo para iti school-based feeding program a mangiyatiddug iti feeding days manipud 120 nga aldaw nga agbalin a 180.
