Imbingay ti Bureau of Immigration (BI) iti sububukel a suportarda iti pannakaipatungpal ti Republic Act No. 12312 wenno ti Anti-Philippine Offshore Gaming Operators (POGO) Act of 2025 a pinirmaan ni President Ferdinand Marcos Jr. idi October 23.
Segun ken ni Immigration Commissioner Joel Anthony Viado, nakikaysa ti BI iti presidente iti pannakaipatungpal ti reporma a gagem a leppasen iti operasyon dagiti POGO iti pagilian.
Iti salinong ti baro a linteg, dagiti aglabsing ket posible a maibalud iti agingga sangapulo ket dua a tawen wenno mamuelta iti agingga P50 million.
Dagiti met gangannaet nga aglabsing ket mai-deport kalpasan ti sentensyada ken agnanayon a saandan a makastrek iti Pilipinas.
Napatibker pay iti RA 12312 ti Executive Order No. 74 nga immunan nga inruar ni Pres. Marcos idi November 2024 a mangiparit iti offshore ken internet gaming gapu iti pannakainaigna kadagiti krimen a kas ti human trafficking ken torture.
