VIGAN CITY – Rinugianen ti Bureau of Fire Protection – Sta. Maria ti panangiwayatda iti Yuletide Season Fire Safety ken Oplan Paputok kasangwanan iti paskua ken baro a tawen.
Iti pannaki-uman ti Bombo Radyo Vigan ken ni Fire Inspector Glenn Paat, adda maituding a firecracker zone wenno paset laeng iti nasao nga ili a maipalubos a paglakuan iti paputok ken uray kadagiti barangay ket adda laeng met ti firecracker zone a mabalin a pagpaputukanda.
Inton umay a lawas ket manamnama ti pannakikinnammayetda kadagiti barangay official tapno mabigbig met laeng dagiti paset a mabalin a pagsindian iti paputok ita a holiday season.
Impasigurado ni Fire Inspector Paat nga addanto agbantay a kameng ti BFP a manginspeksyon kadagiti paglakoan nangruna kadagiti storage ti paputok ta saan a mabalin a maidulin laeng kadagiti pagtaengan.
Kabayatanna, agtultuloy met ti panangiwayatda iti inspeksyon kadagiti agtagilako iti Christmas lights agsipud ta isu ti maysa kadagiti mabigbigbig a pagtaudan ti uram.
