VIGAN CITY- Boluntaryo a simmuko idiay korte ni FO2 Lloyd Galamgam, agtawen ti 29 , naasawaan , miembro ti Bureau of Fire Protection (BFP) – Sto. Domingo ngem, ken taga Rizal , Cabugao kagiddan iti pannakaiparuar ti warrant of arrest na manipud kenni presiding judge Raphiel Alzate ti Regional Trial Court (RTC) 24, Cabugao gapu iti 5 a bilang iti kaso a panaglabsing iti Section 5 wenno Child prostitution and other sexual abuse iti salinong ti Republic Act 7610 wenno Special Protection of Children Against Abuse, Exploitation and Discrimination Act.
Segun kenni P/Insp. Romar Renon, deputy chief of police ti Cabugao Municipal Police Station, ti kaso ket inpila ti lolang ti biktima a babai nga agtawen ti 15 a dati a nobya ni Galamgam ta mapapati nga adda napasamak kadakuada.
Patien ni Renon a namnamaenen ni Galamgam ti pannakakemmeg nan isu a simmuko iti korte nga isun iti nangiyimplimentaran dagiti otoridad ti warrant of arrest kontra kenkuana ket P1 Milyon ti nairekomenda a pyansa para iti temporaryo a pannakawayawaya na.
