Nakasagana a tumulong ti Bureau of Fire Protection – Caoayan kadagiti residente iti manamnama nga epekto ti El Niño kangrunaan ti posible a panagkurang ti danum.
Iti pannakiuman ti Bombo Radyo Vigan ken ni SFO4 Eric Quilana, Acting Municipal Fire Marshal, pinasingkedanna nga iti agdama ket awan pay laeng ti impact wenno epekto ti El Niño kadagiti umili.
Nupay kasta, adda dagti nakasagana a tignay wenno plano ti BFP-Caoayan no addanto ti panagkurang ti suplay ti danum iti lugar.
Segun ken ni Quilana, mabalin danto nga agala ti danum kadagiti karayan, swimming pool ken dadduma pay a resources.
Kabayatanna, nagpalagip ti opisial kadagiti residente nga ikkaten dagiti saksakan dagiti nadumaduma nga appliances iti pagtaengan no saan nga ar-aramaten tapno maliklikan ti uram.
