Maysan nga abogado ti nangabak idi a ‘Best Debater’ ti pasalip ti Bombo Radyo a ‘Debate sa Bombo’ kalpasan a pimmasa iti 2025 Bar Exam.
Iti pannaki-uman ti Bombo Radyo Vigan ken ni Atty. Mariz Esposo, law graduate ti University of Northern Philippines, saan pay laeng arigna a nakapap-papati a maysa isunan nga abogado kalpasan iti maikatlo a gundawaynan nga agexam, nga isu met ti dakkel a pagyamananna iti Namarsua.
Dinakamatna pay a nangrugi a nagarapaap nga agbalin nga abogado sipud isuna ti nangabak a Best Debater iti pasalip idi ti Bombo Radyo a “Debate sa Bombo”, malaksid laeng iti kalikagumna a makatulong kadagiti agkasapulan iti legal a tulong.
Kunana a saan a nalaka ti nagbalin a kapadasanna iti kinaabogasya ta maysa a working student agsipud ta isuna ket agub-ubra pay iti gobierno.
Nupay kasta, silulukat ni Atty. Esposo iti ania man nga oportunidad a dumteng kenkuana kalpasan ti panagbalinnan nga abogado.
