Idurduron ni Parañaque City Rep. Brian Raymund Yamsuan iti panangpainget ti information drive ti Philippine Health Insurance Corp (PhilHealth) tapno ad-adu a Pilipino iti makaammo dagiti benepisyo nga ipapaayda.
Segun ken ni Yamsuan, adu a Pilipino iti saan a makaammo dagiti benepisyo a mabalinda a maala ti PhilHealth uray pay otomatikoda nga agbalin a miembro iti salinong ti Universal Health Care Law.
Kinunana nga adu kadagiti umili iti saan a makaammo a mabanepisyaranda iti PhilHealth kas iti YAKAP wenno Yaman ng Kalusugan a pakaalaanda iti libre a consultations, ken P20,000 a gatad iti agas kada tawen.
Dayta iti impaganetget ni Yamsuan iti deliberasion iti bicameral conference committee iti gakat ti 2026 budget iti Department of Health (DOH).
Kinunana a maysa a panagadal iti rimmuar a kaaddoan a Pilipino ket saanda nga ammo ti YAKAP a nairusat kasukat ti Konsulta program, a mabalin nga agpakonsulta ti doktor, agpa-laboratory a libre, ken makaala iti agas nga agingga P20,000 iti maysa a miembro.
Insingasingna a malaksid iti panangpapigsa ti presensya iti PhilHealth iti social media tapno maipadanon dagiti programada kadagiti Pilipino ket mangisayangkatda pay iti information drive kadagiti komunidad iti tulong dagiti lokal a gobierno.
