Umaboten iti 29,000 a benepisyaryo iti Region 1 ti nakaawat iti libre a sim card babaen iti Bayanihan SIM ti Department of Information and Communications Technology.
Iti pannaki-uman ti Bombo Radyo Vigan ken ni Officer in Charge Regional Director Dr. Jaemie Ruiz-Chua, ti programa ket babaen ti pannakibinnulig ti DICT iti Department of Education ken Department of Social Welfare and Development.
Dagiti benepisyaryo ket pakairamanan dagiti estudiante, teaching ken non-teaching staff ken dagiti 4Ps (Pantawid Pamilyang Pilipino Program).
Adda met ti Network Monitoring System ti ahensia a mangipasigurado a ti maipaay a sim ket mamonitor.
Nabalakadan dagiti benepisyaryo a saanda nga ilako ken aramaten ti sim a pang-scam.
Kabayatanna, pinasingkedan ni Provincial Director Evence Baguilan a manipud iti nasao a bilang dagiti benepisyaryo ket umaboten iti 10,000 ti naipaayan iti Ilocos Sur.
Impasigurado ni Baguilan a na-block manipud iti sim card dagiti site a saan a mabalin kadagiti ubbing kas kadagiti illicit, gambling, ken gaming site.
Ti sim card ket nairehistro iti nagan dagiti nagannakda.
