VIGAN CITY – Kalikaguman dagiti biktima ti Maguindanao massacre a madoble ti bayad-danyos wennu civil damages nga inyetnag ti korte nga awaten da.
Segun ken ni Atty. Harry Roque nga abogado ti sangapulo ket walo manipud kadagiti lima pulo ket walo a biktima iti pannaki-uman kenkuana ti Bombo Radyo Vigan, napateg iti biyag ken saan nga insigida a maala dagiti kameng ti pamilya dagiti biktima ti civil damages a naituding nga awaten da.
Maibasar iti desisyon ti Quezon City Regional Trial Court Branch 221 idi December 19, 2019, makaawat ti tallo gasut ket lima pulo ribo a pisos agingga 23. 5 milyon a pisos dagiti kameng ti pamilya dagiti biktima iti nasao a massacre.
Kabayatanna, umanamong ti dati a presidential spokesman a maiyalis idiay New Bilibid Prison infirmary ni Zaldy Ampatuan nu la ketdi mapaneknekan dagiti doktor a saan na a kabaelan iti makipinnulapol kadagiti pada na a balud iti regular a pagbaludan ken saan a mabalin a mairuwar ket mai-confine iti pribado nga ospital.
