Impanawagan ni Leilani Yabes a taga-Vacunero, Sto. Domingo, Ilocos Sur ti pannakitinnulong dagiti umili ti panangsapul ti nagtakaw iti baterya ti elf truck-da.
Iti pannaki-uman ti Bombo Radyo Vigan ken ni Yabes, idi laeng kalman a naduktalanda a natakaw ti baterya ti luganda idi mapanda koma idiay Batac, Ilocos Norte.
Segun ken ni Yabes, apaman a naduktalan ti driver ti elf truck nga awan ti baterya ti lugan ket impakaammona kenkuana isu a nagreport kadagiti barangay officials.
Iti CCTV footage a nakitada, maysa a lalaki a nakamotorsiklo iti napan iti lugarda idi parbangon idi Biernes ket nakita iti mamindua a panagsubli a napan iti elf truck ken adda iti nailanggusti a bitbitna sakbay a pimmanaw.
Patien ni Yabes nga ammo ti lalaki ti araramidenna ta uray iti pagtaenganda ket liniklikanna idi nagtakaw.
VIDEO – LEILANI YABES
