VIGAN CITY -Maragsakan ni Dr. Jo Eulie Mei Domingo a baro nga Officer-in-Charge iti Office of the Assistant Schools Division Superintendent iti nabara a pannagpasangbay kenkuana ti Department of Education Vigan City.
Kagiddan iti panagtugawna ket pinasingkedanna a nakasagana isuna a makitinnulong tapno maragpat iti dekalidad nga edukasyon iti siudad.
Simrek iti DepEd ni Domingo idi 1997 a kas mangisursuro agingga nagbalin a head teacher, Principal I, Principal II, nag-supervisor iti Values Education iti SDO Laoag City idi 2014 agingga April iti agdama a tawen, iti isu met laeng a bulan ket nagbalin isuna nga OIC-ASDS iti San Fernando Division.
Maipalagip a nabakante iti nasao a posisyon gapu iti panagbalin a College Administrator iti Ilocoas Sur Community College idi June 1, 2021 ni dati nga OIC-ASDS a ni Dr. Arnel Doctolero.
