Maaddaan ti baro nga ebidensia ken alegasion a saan pay a maipagarup a masungbatan ti baro nga impeachment proceedings kontra ken ni Bise Presidente Sara Duterte, segun ti dua a miembro ti Kamara.
Iti agsina nga interview, pinasingkedan da Akbayan party-list Rep. Perci Cendaña ken ACT Teachers party-list Rep. France Castro a nakasagana a sangoen ti karit no kasapulan ti baro nga ebidensia kas ti nadakamat ni House Committee on Justice chairperson at Batangas Rep. Gerville Luistro ken ti National Unity Party.
Impaganetget met ni ACT Teachers Rep. Antonio Tinio a karaman iti baro nga ebidensia a maipakita ti bank records ni Duterte ken ti affidavit ni Ramil Madriaga a nangibaga nga isuna ti dati nga aide ti bise presidente.
Nupay protektado ti Bank Secrecy Law ti confidentiality ti bank deposits, inlawlawag ni Committee on Justice Vice Chairperson ken Bukidnon Rep. Jonathan Keith Flores nga adda exception na daytoy iti kaso ti impeachment.
