Nabara nga inawat ni Pope Leo XIV ti baro nga ambassador ti Pilipinas idiay Holy See a ni Raphael Perpetuo Mercado Lotilla diay Vatican idi July 1, 2026.
Naaddaan ti pormal a taripnong ti dua kalpasan nga impakita ni Lotilla ti credentials-na wenno opisyal a dokumento a mangpaneknek iti pannakadutokna kas mangibagi iti Pilipinas iti Holy See.
Ni Lottilla ket dati a secretary iti Department of Environment and Natural Resources (DENR), ken nagserbi pay a secretary ti Department of Energy iti dua nga agduma nga administrasyon.
Nagturpos isuna iti kurso a Psychology, History, ken Law iti University of the Philippines Diliman, ken nangala ti Masters of Law iti University of Michigan idiay United States.
Malaksid iti panagbalinna nga abogado ken propesor, nagserbi pay ni Lotilla iti agduduma a posisyon iti gobierno ken academia pakairamanan ti National Economic and Development Authority (NEDA) ken Power Sector Assets and Liabilities Management Corporation (PSALM).
