Padpadarasen ni Presidente Ferdinand Marcos Jr. ti panangbukel iti baro a sistema iti panangiwaragawag ti suspension ti klase gapu iti pasaray agbaliw a tiempo.
Segun ken ni Palace Press Officer ken PCO Usec. Claire Castro, gagemda a maliklikan ti pannakaallilaw dagiti nagannak ken estudiante no adda serrek wenno awan.
Maysa kadagiti maad-adal a gakat ti panangted iti kangrunaan a pakaammo kadagiti local government unit, a nasken a mayataday iti Department of Education.
Daytoy ket tapno maliklikan ti agduduma a pakaammo manipud kadagiti mayor, gobernador ken DepEd.
Maibasar met iti panagadal ti Second Congressional Commission on Education, umabot iti mapatta-patta a 10 nga aldaw ti klase ti maawan iti gagangay a pampubliko nga elementary school gapu kadagiti suspension iti School Year 2025-2026.
