VIGAN CITY – Nainaguraranen ti baro a pasdek ti Narvacan Municipal Police Station a masarakan iti national highway ti Barangay San Antonio, Narvacan – abagatan iti Farmer’s Market.
Ti inagurasyon ket indaulwan ni Police Brigadier General John Chua, Regional Director ti Police Regional Office 1, Vice Governor Ryan Singson, Mayor Pablito Sanidad ken Provincial Director Marlo Castillo.
Ti pasdek ket tallo a kadsaaran a ginastosan ti PNP idinto a ti daga a nakaipatakderanna ket indonar met ti gobierno lokal.
Nagyaman ni Mayor Sanidad iti alisto a pannakaipatakder ti PNP Station ket patienna a daytoy ti mangpaneknek nga agtultuloy ti panagpannuray ti linak ken talna iti Narvacan ta ad-adda pay a mapasayaat ti serbisio ti kapulisan kadagiti umili.
