VIGAN CITY – Naituding inton December 14 ti inagurasyon iti baro a police station ti Narvacan iti oras ti alas tres iti malem.
Segun ken ni Police Major Arcadio Viloria, nabayag nga inyur-urayda ti kaadda iti baro a police station ti nasao nga ili ta makitana ti rigat dagiti kakaduana a masapsaprian no agtudo.
Immunan a naidonaran ti Narvacan Police Station iti lote iti sango ti dati nga istasyonda ngem numan pay adda idin dagiti maaramat a pundasyon ket naitantantan ti pannakaipatakderna.
Nupay kasta, pagyamananda ni dati a Mayor Chavit Singson gapu ti panangidonarna iti lote a kiniddaw dagiti kameng ti Narvacan PS ken kasta metten ken ni Mayor Pablito Sanidad Sr ken dagiti Sanggunian Members a nangputar iti resolusyon para ti pannakaipatakder ti baro a police station ti nasao nga ili.
Impaganetget ni Viloria a gapu ta adunton dagiti establisimiento a maipatakder iti Narvacan Farmers Market iti Barangay San Antonio ket kayatda nga isunto ti pokus ti patrolling-da babaen ti pannakaipatakder ti police station iti nasao met laeng a barangay.
Kabayatanna, namnamaenda met nga aprubaran ni Police Provincial Director PCol. Marlo Castillo nga agbalin latta a community precinct ti daan a police station ti ili tapno adda as-asideg a kumamangan dagiti umamianan a barangay ken tapno adda as-asideg nga agresponde kadagiti lugar nga adda iti nasao a paset.
