Immadu manen ti bilang dagiti barko ti China iti West Philippine Sea (WPS).
Maibasar iti report manipud iti Armed Forces of the Philippine (AFP), addan 129 a barko ti China iti WPS manipud Agosto 13 agingga iti Agosto 19, 2024.
Nangatngato daytoy no iyarig iti 92 a bilang dagiti barko ti China a nasaripatpatan idi Agosto 6 agingga iti Agosto 12, 2024.
Kadagiti 129 a barko, 18 ti Chinese Coast Guard Vessels, 13 ti People’s Liberation Army Vessels wenno Chinese warships ken 98 ti Chinese Maritime Militia Vessels.
Nakita dagiti barko iti Bajo de Masinloc, Ayungin Shoals, Pagasa Island, Lawak Island, Patag Island ken Sabina Shoal.
Kalpasanna, impanamnama ti Armed Forces nga agtultuloy ti misionda a mangitandudo iti pannakasalaknib ti kinasoberano ken interes ti pagilian iti West Philippine Sea.
