VIGAN CITY – Inlawlawag ni Rosana Santos, Senior Manager iti Isla Verde Mining and Development Corporation a lehitimo ti kaadda ti dredging vessel iti kabaybayan a sakupen ti Rancho, Santa, Ilocos Sur.
Iti pannaki-uman ti Bombo Radyo Vigan ken ni Santos, gagem ti maisaysayangkat a dredging activities a maliklikan dagiti parikut no adda bagyo ken masigurado ti kinatalged dagiti umili, saan ketdi a ti black sand mining nga ipagpagarup ti kaaduan.
Kunana a naikkan ida iti permit tapno makastrek iti rivermouth a paset iti kasapulan a ma-dredge.
Dagiti lugar a madalanan dagiti dredger ket iti paset ti Vigan City, Santa, ken Caoayan.
June 20, 2022 pay laeng idi maited kadakuada ti permit ngem naladaw laeng a narugian ti lima a tawen ti kapaotna a dredging project gapu kadagiti adu a banag nga inkonsiderarda.
Adda met ti Inter Agency Committee nga agmonitor kabayatan ti dredging activities tapno masigurado nga awan ti madadael a mangpadakes iti aglawlaw.
Kiniddaw met ni Governor Jerry Singson ti panangawat dagiti umili ta awan ti sabali a kayatda no di laeng ti pagsayaatan tunggal adda bagyo a mapasaran.
Segun ken ni Gov. Singson, naadal a nasayaat ti nasao a proyekto babaen kadagiti eksperto isu nga awan ti pakaisagmakan ti aglawlaw.
Inlawlawagna a kasapulan ti dredging tapno umadalem ket adda dumalanan ti danum no tiempo ti bagyo tapno saanen nga agramaram pay kadagiti talon ken kabalbalayan.
