Saan nga ilaksid ni dati a Surigao del Norte Rep. Robert Ace Barbers a maipada ti West Philippine Sea (WPS) iti Strait of Hormuz isu a rumbeng nga agkaykaysa ken agpanawagan ti international community.
Inaramid ti agpampanday linteg ti panagsarita gapu iti agtultuloy a panagtignay ti China tapno makontrol ti West Philippine Sea kas iti inaramid iti Iran iti Strait of Hormuz a nakaapektar iti ekonomia iti adu a pagilian iti lubong.
Kinunana a rumbeng nga agkaykaysa ti international community tapno leppasenen ti China iti panangsakup iti kabaybayan ta agtultuloy iti panagtignayda kas iti naipan a floating platform idiay Bajo de Masinloc nga adda iti uneg ti territorial water iti Pilipinas.
Nagballaag ti dati nga agpampanday linteg a saan laeng a ti Pilipinas ti apektado no makontrol iti China iti WPS ta ad-adu pay a pagilian iti lubong ta posible a saan ida a padalanen wenno pagbayadenda ida kadagiti panagdalanda a kas iti inaramid ti Iran kadagit oil tankers a dumaldalan ti Strait of Hormuz.
Kinunana a tapno maliklikan a pasamak dayta ket kasapulan nga agpanawagan ti International Community ken ipressure ti China a sumurot ken irespeto ti international law tapno masigurado a saan a maapektaran ti international trade ken maritime security.
