Maysa a barangay tanod ti nagtakaw iti cellphone idiay Brgy. Del Pilar, Tagudin.
Nabigbig ti suspek a ni Mildred Leal Lacandazo, agtawen ti tallopulo, balasang nga agnaed idiay Brgy. Ambalayat Tagudin idinto a ti biktima ket ni Francis John Compañero, agtawen iti tallopulo ket pito, naasawaan nga agnaed idiay Pallogan, Tagudin.
Segun iti Tagudin Municipal Police Station, impakaammo ti maysa a cellphone technician a ni Keth Collins Emnance a kiniddaw ti suspek kenkuana nga ikkatenna iti password ken ire-programna iti cellphone a Blue green Samsung A30 ngem idi nalukatanna ti cellphione ket nakitana ti ladawan ti biktima isu a pinakaammuanna ti otoridad.
Nagresponde dagiti pannakabagi ti linteg iti Gigacell Cellphone repair a masarakan iti Public Market, Tagudin a gappuanan ti pannakakemmeg ti suspek.
Naamuan nga idi pay laeng January 15 iti agdama a tawen a napukaw ti nasao a cellphone ti biktima.
Kabayatanna, ti nakemmeg a suspek ket naipan iti Ilocos Sur District Hospital Bio, Tagudin para iti medical examination-na ngem naiyakar met laeng idiay Tagudin Police Station para iti pannakaimbestigarna.
