VIGAN CITY – Kaso a frustrated murder ken tallo a bilang ti attempted murder ti sangwen ni Alexander Regua, Barangay Tanod, agnaed iti Barangay Subec, Sta. Catalina a suspek iti pammaltog iti nasao a lugar.
Ti biktima ket ni John Paul Tadios Ragunjan, agtawen iti duapulo ket uppat, agnaed iti Barangay Subec a nagsagaba iti tama ti paltog iti tyanna.
Iti pannaki-uman ti Bombo Radyo Vigan ken ni Police Captain Marlon Martinez iti Sta. Catalina Police Station, adda karirriri ti biktima a dua a tattao idin ta bimmallaet ti suspek ket bigla a nagpaputok iti namin innem a daras a nakaipaturung iti ayan ti biktima ken dagiti karir-ririna.
Dagus a nangiwayat dagiti pannakabagi ti linteg iti hot pursuit operation ta idi agrespondeda iti nakapasamakan ti pammaltog ket awanen a nadanunda ti suspek idinto a dagiti police station iti kabangibang nga ili ket nangiwayat met iti iti dragnet operation.
Kabigatanna ket natiliw met laeng ti suspek ta nagturongda kaduana ti kapitan ti barangay iti kuerpo ti pulisya ngem saanna nga iggem ti paltog nga inusarna.
Kabayatnna, alas nuebe bainte y sais ket nakaawat met dagiti pannakabagi ti linteg iti tawag manipud iti kapitan ti barangay idiay Subec ket impaimada ti maysa a paltog a nasarakan sangagasut a metro manipud iti nakapasamakan ti pammaltog.
Malaksid dayta, nadakamat ti biktima a datin nga adda susik iti nagbaetanda ti suspek gapu ti maysa a post iti social media.
