VIGAN CITY – Nagballaag ni Provincial Board Member Efren “Rambo” Rafanan kadagiti barangay nga umaw-awat iti pasuksok a dua gasut a pisos tapno maiserrek ditoy probinsia dagiti baboy a saan a dimmalan iti quarantine checkpoint ta mabalinda a pakaibaludan.
Dayta ket kalpasan ti pannakatiliw ni Deward Ines idiay Dadalaquiten, Sinait a nangikarga iti tallo a baboy iti kurong-kurong a naggapu iti Ilocos Norte ket inserrekna ditoy probinsia.
Iti pannaki-uman ti Bombo Radyo Vigan ken ni Rafanan, awan ti kalintegan ti barangay nga umawat iti pasuksok ken saanda a quarantine.
Inlawlawag ni Rafanan nga awan parikut kadagiti baboy nga aggapu iti green zone ngem ti laeng kiddawna ket agpaidalanda iti quarantine checkpoint ket saan a dagiti barangay ti pangidaldalananda tapno makita a naimbag no ania a lugar ti pakaipananna agsipud ta ti napateg ket kompleto dagiti dokumento.
Pakaragsakanna no adda dagiti maipastrek a baboy ditoy probinsia a naggapu kadagiti lugar a saan nga apektado iti African Swine Fever tapno masupusupan iti kurang a suplay ngem nupay kasta ket maimbestigaran ti napasamak.
