VIGAN CITY – Balligi ti pannakaiwayat ti search warrant operation kontra ken ni Barangay Kagawad Rodel Dela Cruz Nartatez, agtawen iti tallopulo ket pito, taga-Barangay Abuor, Narvacan gapu ti kaso a panaglabsing iti RA 10591 wenno Illegal Possession of Firearms and Ammunition Act.
Ti search warrant kontra ken ni Nartatez ket inruar ti Presiding Judge ti RTC Branch 72, Narvacan, Ilocos Sur.
Naala manipud iti kusina ti pagtaengan ti akusado ti maysa a Smith and Wesson Caliber 38 revolver nga awan ti serial number na ket adda kargana nga uppat a bala.
Iti pannaki-uman ti Bombo Radyo Vigan ken ni Police Major Alexander Dangli, adda dagiti maidandanon kadakuada a tunggal makainom iti arak ti akusado ket ipakpakitana latta ti paltogna.
Nupay kasta, pinaglibakan met ti akusado a kukuana ti paltog ken nagatang daytoy manipud iti saanen a nabigbig nga akinkukua.
