Nainget nga ipatungpal ti Barangay Nalasin, Sto. Domingo, Ilocos Sur dagiti ordinansada tapno mapagtalinaed ti kinadalus, kinaurnos, ken kinatalged ti lugar babaen iti panangidaulo ni Barangay Captain Vicente Gonzales Jr.
Iti pannaki-uman ti Bombo Radyo Vigan ken ni Gonzales, karaman kadagiti maiparit dagiti stray dogs iti kalsada, panangibelleng iti basura kadagiti kalsada ken kanal, panagaramat iti naariwawa a muffler ti motorsiklo, ken panagparking kadagiti lugan a makasali kadagiti kalsada ken eskinita.
Muelta a P600 agingga P1,000 ti mabalin a masingir kadagiti aglabsing iti ordinansa ti stray dogs, idinto a P1,000 met kadagiti aglabsing iti muffler ordinance.
Agtultuloy ti panagpatrolya kadagiti barangay tanod ken opisial tapno masigurado a masurot dagiti agindeg ti ordinansa.
