VIGAN CITY – Natay ti maysa a barangay kagawad kabayatan iti ayayam ti basketball idiay Brgy. Bucalag, Santa.
Nabigbig ti biktima a ni Marlon Racoma, naasawaan, agnaed ken konsehal ti Brgy. Paratong, Vigan.
Iti pannaki-uman ti Bombo Radyo Vigan kenni Brgy. Capt. Estelita Deperalta, impakammu kenkuana ti management ken dagiti players a natalimudaw ni Racoma idi nalpas nga imminom ti danom ti 4th quarter ti ayayam ti basketball a paset iti panagfiestada.
Naipan nga insigida ti Ilocos Sur District Hospital Narvacan ti biktima ngem pimmusay.
Innayon ni Jeffrey Canosa, referee ti ayayam, awan iti nadlawda a naidumduma kenni Racoma kabayatan iti panagayayamna ken iso ti maysa kadagiti pamigsaen ti teamda aginggan nag-time out da ti 4th quarter ket napasamak ti insidente.
Segun kenni Juvylyn Racoma, asawa ti biktima, impakammu kenkuana dagiti doktor nga adda iti sakit ti puso ti asawana a saanda nga ammu a puon iti pannakatayna.
Ti agdama nakaimasayagen ti bangkay ni Kagawad Marlon ti pagtaenganda idiay Brgy. Paratong, Vigan ken mangisayangkat ti Brgy. Bucalag, Santa ti misa para kenkuana.
