VIGAN CITY- Awan pay iti pamalpalatpatan dagiti otoridad ti motibo iti pannakapapatay ni Wilson Leones, dati number 1 barangay kagawad idiay Banaoang, Bantay a pinaltugan dagiti saan a nabigbig a suspek idiay Cabaroan , Bantay .
Segun iti Bantay Municipal Police Station, awan ti ammo ti pamilya ni Leones a nakariri na iti napalabas sakbay iti pammapatay.
Maibasar iti imbestigasyon ket nagapu ti galleraan idiay ili ti Caoayan ti biktima ket agawid kuman a nakalugan iti Starex van na ngem dimmagas ti empanada idiay Brgy.Cabaroan.
Kabayatan nga iyur-uray na ti empanada iti uneg ti lugan na ket pinaltugan dagiti suspek a nakalugan ti mio motorcycle ket nagsagrap ti lima a tama iti nadumaduma a paset ti bagi na kangrunaan ti bakrang ken barokong idinto a nairaman met ti aglaklako ti empanada a ni Edna Peralta a natamaan ti abaga na.
Naala manipud iti lugan ni Leones ti maysa a caliber 22 nga adda ti magazine ken lima a bala na.
