Maysa a barangay kagawad ti nakemmeg kalpasan ti mapapati a panangpak-olna iti maysa a lalaki babaen iti kawayan iti ili ti San Ildefonso, Ilocos Sur.
Ti biktima ket maysa a government employee, agtawen iti duapulo ket lima, idinto a ti suspek ket agtawen iti limapulo ket lima, mannalon, barangay kagawad, agpada nga agnaed iti nasao a lugar.
Idi nagresponde dagiti pannakabagi ti San Ildefonso Police Station, nadanonanda ti suspek a nakaiggem iti kawayan a mapapati nga inaramatna a nangdangran, idinto a ti biktima ket naitaray iti ospital.
Maibasar iti imbestigasion, agmanmaneho ti biktima iti motorsiklo nga adda modified muffler-na a nangitunda iti naariwawa nga uni kabayatan ti panaglikmotna iti barangay.
Gapu dayta, sinitar isuna ti barangay kagawad ket binagaanna a saanna nga aramaten daytoy a motorsiklona ta napalalo ti ariwawana.
Nupay kasta, intuloy latta nga inaramat ti biktima ti motorsiklona, ket isu metten ti gundaway a bigla nga impak-ol ti suspek ti kawayan iti ulo ti biktima a nagsagabaanna iti dunor.
