VIGAN CITY – Pagyamanan ni Barangay Kagawad Danilo Visico a natalgedda kadagiti sabali pay a kakaduana a naglugan iti van a nakidinnungpar iti maysa a mini bus idiay Barangay Dan-ar, Santiago ngem pakaladingitanda laeng a maysa kadakuada ti natay a ni Gertrudis Pabillonar, taga-Sabuanan, Sta. Lucia.
Iti pannaki-uman ti Bombo Radyo Vigan ken ni Visico, nairidepda dagiti kakaduana kabayatan ti biaheda nga agawid ngem nakigtot isuna nga idi makariing ket agsasangit ken dara-dara ti kakaduana.
Natalged met ti kasasaad ni Brgy. Kagawad Visico ngem agalenna laeng tay sakana ken ti dadduma a gasgas iti bagina idinto a dagiti kakaduana a sabali ket matamtaming met iti balay pagagasan.
Innayon ni Brgy. Kagawad a naannad met ti panagmaneho ti drayber a ni Brgy Captain Mariano Almani Agusen ta isu ti kanayonda a lumugluganan no adda lakadda.
Sakbay ti aksidente ket nadlawna a namin-ano a sinukta-suktan ti biktima ti tsinelasna idinto a dagiti kabbalayna ket nagkibbayo ti barukongda ngem saanda met nga impagarup a kastoy ti mapasamak.
Kabayatanna, pinasingkedan met ti maysa kadagiti nakaimatang ti pasamak a ni Renato Blanse a kagapgapuda a nag-solicit iti siudad ti Vigan para ti panagpiestada idi napasamak ti aksidente.
Segun ken ni Blanse, accident prone area ti lugar ta adda manen naak-aksidente iti nasao a paset ti kalsada ken napapaspas pay dagiti lugan a dumaldalyasat.
