Barangay chairman ken barangay kagawad a nagkalubbon iti motorsiklo, naaksidente, nadundunor

VIGAN CITY –  Naipaagas idiay Ilocos Sur District Hospital – Narvacan ti barangay chairman ken barangay kagawad ti Nanguneg, Narvacan ta naidungpar iti nagluganan da a motorsiklo ti maysa a Toyota Vios idiay kalsada ti San Jose, Narvacan.

Nabigbig dagiti dua a da Barangay Captain Aquilino Cabradilla Dominguez nga agtawen ti innem a pulo, naasawaan a naglugan ti Yamaha NMAX a minaneho ni Barangay Kagawad Gonzalo Macabeo Alendido nga agtawen ti lima pulo ket walo, naasawaan nga agpada nga agnaed idiay Barangay Nanguneg, Narvacan.

Segun ken ni Police Captain Arcadio Viloria, hepe ti Narvacan municipal police station, agpapa-abagatan dagiti dua a nakamotorsiklo ket idi nakadanun da iti nakapasamakan iti aksidente, adda ti Toyota Vios a minaneho ni Marvin Go Espinosa nga agtawen ti dua pulo ket siyam, baro nga agnaed idiay Barangay 7, Vigan City a nag-U-turn a naggapu iti akin-kannawan a shoulder iti highway isu a nadungpar na dagiti biktima.

Gapu iti kapigsa iti pannakaidungpar iti motorsiklo a nagluganan dagiti biktima iti nasao a kotse, naipurwak da Alendido kenni Dominguez ket nagsagaba da iti dunor iti naduma-duma a paset iti bagi da idinto a ni Espinosa ket saan met a naan-ano.

Mapapati a nakainom dagiti dua a nagkalubbon iti motorsiklo ta naggapu da ti maysa a pasken iti kabangibang a barangay.