VIGAN CITY – Maysa a short magazine a naglaon iti sangapulo ket walo a bala ti M16 rifle; maysa a short magazine a naglaon iti dua pulo ket maysa a M16 rifle; sangapulo ket innem a bala ti caliber 45; dua a fired cartridge iti caliber 38 ken maysa a bala iti isu met laeng a kalibre iti paltog, maysa a nangisit a baina iti short firearm kasta pay iti maysa a green belt bag a naglaon iti dua a bala ti m16 iti naala iti uneg iti pagtaengan ni Barangay Chairman Rene Bravo Barrientos nga agtawen iti uppat a pulo ket lima, naasawaan ken agnaed idiay Barangay Casiber, Santa idi alas syete kwarenta iti agsapa idi June 19.
Segun ken ni Police Major Rodel del Castillo, adda iti naaw-awat dan a report inaig iti panagpaputok iti paltog ni Barrientos isu a nag-apply da iti search warrant inaig iti kaso a panaglabsing ti Republic Act 10591.
Ti search warrant nga inbanag dagiti otoridad ket naiparuwar idi June 14 iti sala ni Judge Marita Bernales Balloguing, Regional Trial Court Branch 20, Vigan City.
Naikustodiya idiay Santa municipal police station ti suspek kabayatan a maisagsagana dagiti dokumento a masapul para iti pannakaipila iti kaso kontra kenkuana.
