Saanen nga awaten ti Commission on Elections (Comelec) ti barangay certificates kas proof of residency para ti voter registration.
Dayta ti pinasingkedan ni Comelec Chairman George Erwin Garcia kasangwanan ti panaglukat manen ti panagrehistro dagiti botante manipod July 1 agingga 11.
Segun ken ni Garcia, narevise-dan ti guidelines iti registration ken inikkatdan ti barangay certificates kadagiti mabalin a pammaneknek iti pudno nga address.
Dayta ket gapu iti mapapati a panagaramat dagiti korap a barangay official tapno iyakar dagiti botante wenno ikkaten dagiti pagarupenda a kalaban.
Ti addang ket kalpasan a namonitor ti poll body ti sumagmamano nga insidente iti napalabas a midterm elections ken ti naireport a panagado dagiti botante manipod iti sabali a barangay kas idiay Makati City ken Cagayan de Oro City.
Linuktan ti Comelec ti voter registration para iti umadanin a Barangay ken Sangguniang Kabataan Elections inton December 1.
