VIGAN CITY – Mapilaan iti kaso ni Barangay Captain Juanito Antolin Basconcillo Jr., agnaed iti Barangay Calungboyan, Santa gapu ti mapapati a panangdangranna iti ipagna a ni Erlinda Bragado Basconcillo, agtawen iti pitopulo ket maysa, agnaed met laeng iti nasao a lugar.
Iti pannaki-uman ti Bombo Radyo Vigan ken ni Police Captain Mark Bryan Corpuz iti Santa Police Station, kwinestyonaran ni Barangay Captain Basconcillo ti panangsakup iti kalsada ti maipatpatakder a balay ti biktima idin ta rimsua ti saanda a a pagkinnaawatan ket mapapati a natungpa ti suspek ti namindua a daras ti biktima.
Pinasingkedan pay ti biktima a kalpasan ti pasamak ket nagsubli ti suspek iti pagtaengan ti biktima ket nagpaputok iti paltogna a nakaipaturug iti ngato ken insawangna iti biktima iti “Patayabek ta banga-bangam” isu a dagus met nga immadayo ti sispek ket nagpatulong kadagiti kabagyanna.
Boluntaryo met nga insuko ti suspek ti paltogna kadagiti pannakabagi ti linteg nga isu ti maidalan iti ballistic examination.
Iti met pannakipatpatang ti Bombo Radyo Vigan ken ni Barangay Captain Basconcillo Jr, kinunana a saanna nga ammo a nasipatna ti biktime ket kunana pay pagrebbengenna laeng met kas maysa nga opisial nga agsao iti maipanggep ti panangsakupda iti kalsada ta manarimaan pay met ti panangpalpalawa iti kalsada iti masakupanda.
Malaksid dayta, pinasingkedanna a saanna laeng met kayat nga adda maibagbaga ti kalugaranda nga amangan ta ipagarupda a gapu a kabsat ti kapitan ket mapanuynuyan ti madi nga aramidda.
